Wanderlust dey cut shoe (Àrìnká njá bàtà)

I see one orange for sky,
E fat well well,
And e ripe well well,
E hot pass fire,
But im beauty pass that of Clara.

I carry my head up,
This orange for sky too hot,
E be like say my head na pot,
Plenty sweat, I sweat no be small,
Like hot water na im the thing dey boil.

This my waka no be small,
And me I no mind at all,
This my waka no be small,
Wetin I dey find…
Na im give me liver chop.

Water wey fine wey clean,
Water wey dey halla, wey dey jolly,
Water wey big, wey dey fall,
Water wey im “gbosa” “gbosa” no they stop,
Dem talk say e dey,
For one forest, wey far tey tey,
Big bush for Ikom village, na im e dey.

”E go dey?”, I com dey reason,
The thinking dey totori my belle,
Although hunger don wire me tire,
My belle me I no send o, I no go tire,
Because that water I must to find and put for camera.

Although my sálú bàtà dey halla,
Even my leg sef don worry tire,
Na Sharp sharp I clear them:
“warri boy no dey carry last, una hear am?”,
Because…
Agbokim waterfall na the water,
Wey go cure my àrìnká,
even if to find am go já my bàtà

– Agbokim Waterfalls, Cross-River State, Nigeria.

Agbokim Waterfalls, Cross-River State